२३ पुस,

बाँके । बाँके जिल्लाका विभिन्न स्थानबाट प्रहरीले लागूऔषध (ब्राउन सुगर) सहित तीन जनालाई पक्राउ गरेको छ । पक्राउ परेकामध्ये दुई जना कोहलपुर नगरपालिका–११ र एक जना नेपालगञ्ज उपमहानगरपालिका–२० राँझा क्षेत्रबाट पक्राउ परेका हुन् ।

जिल्ला प्रहरी कार्यालय बाँकेका अनुसार कोहलपुर नगरपालिका–११ टेलिकम कार्यालय नजिक कोठा भाडामा बस्दै आएका मुकेश बम र कृपा तामाङको कोठामा खानतलासी गर्दा लागूऔषध फेला परेको हो । खानतलासीका क्रममा कोठाको भुइँमा रहेको बिस्तरामुनि लुकाइछिपाइ राखिएको प्लास्टिकभित्र १७ पुडिया ब्राउन सुगर जस्तो देखिने खैरो धुलो पदार्थ फेला परेको प्रहरीले जनाएको छ ।

बरामद गरिएको उक्त पदार्थको शुद्ध तौल ६ ग्राम ३५० मिलिग्राम रहेको छ । साथै, घटनास्थलबाट नेपाली नगद रु. ८९ हजार ९ सय, आईफोन १२ प्रो मोबाइल एक थान र रियलमी कम्पनीको स्क्रिन टच मोबाइल एक थान समेत बरामद गरिएको छ ।

पक्राउ पर्नेमा कालिकोट जिल्लाको रास्कोट नगरपालिका–५ घर भई हाल कोहलपुर–११ मा बस्दै आएका २३ वर्षीय मुकेश बम र नेपालगञ्ज उपमहानगरपालिका–४ गणेशपुर घर भई हाल कोहलपुर–११ मा बस्दै आएकी २० वर्षीया कृपा तामाङ रहेका छन् । उनीहरूलाई सम्मानित बाँके जिल्ला अदालतबाट ७ दिनको म्याद थप गरी थप अनुसन्धान भइरहेको प्रहरीले जनाएको छ ।

यसैगरी, नेपालगञ्ज उपमहानगरपालिका–२० राँझा क्षेत्रमा लागूऔषध कारोबार भइरहेको विशेष सूचनाका आधारमा इलाका प्रहरी कार्यालय कोहलपुर र लागूऔषध नियन्त्रण ब्यूरो नेपालगञ्जबाट खटिएको संयुक्त प्रहरी टोलीले रफिक खानलाई पक्राउ गरेको हो ।

प्रहरीले भे.११.प.३६६ नम्बरको मोटरसाइकल चेकजाँच गर्ने क्रममा रफिक खानको साथबाट १०३.०३० ग्राम ब्राउन सुगर जस्तो देखिने पदार्थ, मोबाइल फोन एक थान र मोटरसाइकल समेत बरामद गरेको जनाएको छ । त्यसपछि निजको घर कोठामा थप खानतलासी गर्दा दराजभित्र लुकाइ राखिएको २.०७ ग्राम ब्राउन सुगर समेत फेला परेको थियो ।

यसरी कुल १०५ ग्राम १०० मिलिग्राम ब्राउन सुगर र नगद रु. ५० हजार बरामद गरिएको प्रहरीले जनाएको छ । पक्राउ पर्ने रफिक खान बाँके जिल्ला जानकी गाउँपालिका–५ बुढिया गाउँका ३७ वर्षीय हुन् । उनलाई सम्मानित बाँके जिल्ला अदालतबाट १० दिनको म्याद थप गरी अनुसन्धान अघि बढाइएको छ ।

जिल्ला प्रहरी कार्यालय, बाँकेका सूचना अधिकारी प्रहरी नायब उपरीक्षक दीपक पातलीका अनुसार लागूऔषध नियन्त्रणका लागि जिल्लाभर कडाइका साथ अभियान सञ्चालन भइरहेको र यस्ता गैरकानुनी गतिविधिमा संलग्न जोसुकैलाई पनि कानुनी दायरामा ल्याइनेछ ।