नेपालगञ्ज, बाँकेको जमुना भन्सार बाहिर लामो समयदेखि अव्यवस्थित रूपमा रहेको पार्किङ्ग व्यवस्थापनमा सुधार ल्याउने उद्देश्यले नेपालगञ्ज उपमहानगरपालिका नगर प्रहरी सक्रिय बनेको छ।

नगर प्रहरीले विशेष अभियानमार्फत भन्सार क्षेत्र वरिपरि रहेका अव्यवस्थित सवारी साधन हटाएको हो। यस अभियानले सडक सुरक्षालाई बढाउने मात्र नभई सार्वजनिक स्थानहरूको सौन्दर्य र आवागमनमा समेत सहजता ल्याएको स्थानीयवासीहरूले बताएका छन्।

नेपालगञ्ज उपमहानगरपालिकाका नगर प्रहरीका अनुसार यो अभियान नगरपालिकाको सवारी तथा ट्राफिक व्यवस्थापन सुधार योजना अन्तर्गत सञ्चालन गरिएको हो। “सार्वजनिक स्थानमा अनियमित रूपमा गरिएको पार्किङ्गले ट्राफिक व्यवस्थापनमा समस्या हुँदै आएको थियो। अब हामीले त्यसलाई नियन्त्रणमा ल्याएका छौं,” उनले बताए।

यस कार्यले स्थानीय व्यापारी, यात्रु तथा ट्राफिक प्रहरीलाई समेत राहत दिएको छ। भन्सार क्षेत्रमा देखिएको अनुशासन र सुधारप्रति सर्वसाधारणले पनि सन्तोष व्यक्त गरेका छन्।

नगरपालिकाले आगामी दिनहरूमा पनि यस्ता सुधारात्मक अभियानलाई निरन्तरता दिने बताएको छ।