पर्वत : सशस्त्र प्रहरी बल नेपालले आफ्नो स्थापना दिवस विविध कार्यक्रमका साथ मनाएको छ। कार्यक्रमका अवसरमा सुरक्षा निकायले वर्षभरि गरेका गतिविधि, आगामी योजना तथा कार्यप्रगतिको समीक्षा समेत प्रस्तुत गरिएको थियो।

कार्यक्रममा बोल्दै प्रमुख अतिथिहरूले नागरिकको सुरक्षालाई पहिलो प्राथमिकतामा राखेर काम गर्नुपर्नेमा जोड दिएका थिए। साथै, नागरिकले असुरक्षित महसुस गर्ने वातावरण सिर्जना हुन नदिन सशस्त्र प्रहरी अझ जिम्मेवार बन्नुपर्ने धारणा राखिएको थियो।

मुलुकको जटिल परिस्थितिमा स्थापना भएको सशस्त्र प्रहरी बल देश र जनताको सुरक्षाका लागि चौबीसै घण्टा खटिने प्रतिबद्धता व्यक्त गरिएको छ।

सो अवसरमा सशस्त्र प्रहरी बल नेपाल नं. २५ गण हेडक्वाटर चण्डिका, पर्वतका गणपति सशस्त्र प्रहरी उपरीक्षक क्षितिज क्षेत्रीले वर्षभरि सञ्चालन गरिएका गतिविधि तथा आगामी कार्ययोजनाबारे जानकारी गराएका थिए। उनले उच्च मनोबलका साथ काम गर्न मातहतका कर्मचारीलाई निर्देशन समेत दिएका थिए।

दिवसका अवसरमा विभिन्न धार्मिक तथा सांस्कृतिक स्थलहरूको सरसफाइ, रक्तदान कार्यक्रम, खेलकुद तथा व्यावसायिक प्रतियोगिता, विद्यालयस्तरीय सचेतनामूलक कार्यक्रम, वृक्षारोपण लगायतका कार्यक्रम आयोजना गरिएको थियो।

त्यस्तै, मुख्य समारोहमा विभिन्न प्रतियोगितामा उत्कृष्ट हुनेहरूलाई पुरस्कार वितरण, अवकाशप्राप्त कर्मचारीलाई सम्मान तथा कदरपत्र प्रदान, उत्कृष्ट कार्य सम्पादन गर्ने कर्मचारीलाई पुरस्कृत गर्नुका साथै अमर सशस्त्र प्रहरी परिवारलाई सम्मान गरिएको थियो। कार्यक्रमको अन्त्य केक काटेर उत्सवका रूपमा मनाइएको थियो।

कार्यक्रमको सञ्चालन सशस्त्र प्रहरी निरीक्षक धर्मबहादुर थापाले गरेका थिए भने जिल्ला समन्वय समिति पर्वतका प्रमुख विष्णुराम विक र प्रमुख जिल्ला अधिकारी लक्ष्मीप्रसाद पौडेल लगायतको उपस्थिति रहेको थियो।