काठमाडौं, चैत २७ – राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले अहिलेका प्रहरी महानिरीक्षक (आईजीपी) दीपक थापामाथि गम्भीर आरोप लगाएका छन्। मंगलबार काठमाडौंको बल्खुमा आयोजित खबरदारी सभालाई सम्बोधन गर्दै लिङ्देनले थापामाथि नेपाल कम्युनिस्ट पार्टी (एमाले) निकट युवा सङ्घको सहअध्यक्ष रहँदाको आरोप लगाएका हुन्।
लिङ्देनले चैत १५ गतेको तीनकुने आन्दोलनको सन्दर्भ कोट्याउँदै सरकार र सुरक्षानिकायको भूमिकामाथि प्रश्न उठाए। “गृहमन्त्रीले आदेश दिए होलान्, प्रहरी चले होलान् भनेको त अहिलेको प्रहरी प्रमुख त एमालेको युवा सङ्घको सहअध्यक्ष पो रहेछ, हेर्नुस् त,” लिङ्देनले आक्रोश व्यक्त गरे। उनले थपे, “हामीले तीनकुनेमा भोगेका अश्रुग्यास दुर्गा प्रसाईंले हानेका हुन् त? त्यो प्रहरी प्रमुख भन्छ – अश्रुग्यास डेट एक्सपायर भएर विस्फोट भएछ। यस्तो लाजै नमान्ने?”
अध्यक्ष लिङ्देनको दाबीअनुसार सुरक्षानिकायको नेतृत्वले राजनीतिक दलहरूसँगको साँठगाँठ त्यागेर स्वतन्त्र, निष्पक्ष र लोकतान्त्रिक मूल्यमा आधारित हुनुपर्नेमा जोड दिनुपर्ने अवस्था आएको छ। उनले प्रहरीप्रति जनताको विश्वास कमजोर हुनेगरी भएको यस्तो राजनीतिक संलग्नता लोकतन्त्रको लागि खतरा भएको चेतावनी दिए।
“प्रहरी प्रहरी भएर बस्नुपर्छ,” उनले भने, “राजनीतिक दलको भातृसङ्गठनको रूपमा नबसोस्। प्रहरीको काम हो जनताको सुरक्षाका लागि निष्पक्ष रूपमा काम गर्नु – न कि पार्टीका कार्यकर्ता जस्तो व्यवहार गर्नु।”
प्रहरी प्रमुख दीपक थापाले एमालेको युवा सङ्घमा सहअध्यक्षको रूपमा संलग्न रहेको भन्ने लिङ्देनको आरोपको आधिकारिक पुष्टि भने भइसकेको छैन। यसबारे गृह मन्त्रालय वा प्रहरी मुख्यालयले हालसम्म कुनै प्रतिक्रिया दिएको छैन।
लिङ्देनको यस्तो अभिव्यक्तिले मुलुकको राजनीतिक वृत्तमा नयाँ बहसको सुरुवात गराएको छ। सुरक्षा संयन्त्रको स्वायत्तता र निष्पक्षतामाथि उठेका प्रश्नले सत्ता पक्षमाथि पनि दबाब सिर्जना हुने देखिएको छ।
